باك  =)

هذا البوست تكملة للبوست اللي طاف .. فإذا ما كنت قاري البوست اللي طاف روح اقراه وارجع

=)

وصلت الكلية قبل موعد المحاضرة بربع ساعة تقريبا

بس تعمدت ما أدخل الكلاس

كنت أبي أكون آخر واحد يدخل عشان محد يسألني عن اللي بيدي

دخلت الكلاس قبل لا تبدي المحاضرة بدقيقتين

وكانت الدكتورة موجودة

كان شكلي غريب وأنا شايل بيدي جيسين

واحد من الطلبة سألني عن ضحك : رايح السوق قبل لا تيي الكلية ؟

قلت له تقريبا

وضحكنا

.

.

مشت المحاضرة

وأنا ناطر البريك

وأول ما قالت الدكتورة خلونا ناخذ بريك قمت

جان أقول : ممكن تعطوني دقيقة من وقتكم ؟

: وبديت أتكلم وتقريبا هذا اللي قلته

الشهر اللي طاف كان أعظم شهر عندنا

اللي هو رمضان - شهر الصوم

"معظمهم سامعين فيه"

وبعد الشهر العظيم هذا تكون عندنا وحدة من أهم المناسبات في التقويم الإسلامي

أقدر أقول إنها بأهميتها تعادل كريسمس عندكم

بهذي المناسبة نحب ننشر الفرح ونرسم البسمة

الكل يكون مستانس بهاليوم

عندنا شي اسمه العيدية

وهي عبارة عن مبلغ نقدي اللي يشتغلون يعطونه حق اللي لما الحين يدرسون

وبالعيد دايما نشتري حلو ونقدمه حق الضيوف

فـ أنا اليوم حاب أحتفل بعيدنا معاكم

وحاب تشاركوني الفرحة اللي نفرحها بالعيد

ولذلك .. أنا يايب هدية بسيطة حق كل واحد فيكم

ووزعت عليهم علب كاكاو

وقلت لهم : يايب لكم حلو العيد خصوصي من لبنان

وفتحت علبة بقلاوة وحطيتها بالنص

وقلت لهم اللي مسوي ريجيم خل يدير باله

أنا مو مسؤول عن تدمير الريجيم

بعدين قلت لهم

وفي ناس سبشل .. فأنا يايب لهم هدايا سبشل

وطلعت هدايا كنت شاريها حق الجروب اللي معاي

وعطيتهم إياهم

الطلبة كلهم كانو منصدمين وبنفس الوقت الابتسامة شاقة حلوجهم =)

المنظر كان واااااااااايد حلو

والجو كان واااااااايد حلو

تيمعنا بعدين عند البقلاوة

وبدو يسئلوني عن العيد

وعن رمضان

وعن الصيام

.

.

باختصار

كان الجو أحلى مما توقعت

واستجابتهم أحسن مما توقعت

 عسى الله يشرح صدورهم للإسلام

..

الحمدلله =)

..

..:: خالد ::..