|
« دراسة ! |
Main
| تفاحة مكة !! »
^_^ قوّه الحمدلله خلصنا السيمستر الأول ورجعنا الكويت والحمدلله شفنا الأهل والربع والحبايب ( مو كلهم طبعا =P ) ومن وصلت والعزايم هلت كل واحد يبي يطلع معاي بروحه أو مع ناس محفوفين انزين خلوني أسوي عزيمة كبيرة وخلاص .. نشوف الكل مرة وحدة لا .. كل واحد عنده سوالف ووده ياخذ راحته( مشكلة إذا صارت عندك مهارة الإنصات =P ) الغريب ان وايد ناس يبون يعزموني يوم الثلاثا لدرجة إني رتبتها بالنهاية بحيث يكون عندي ريوق وغدا وقهوة وعشا مادري .. هل لأنه عطلة ؟ وإلا الناس يبون يحتفلون بعيد ميلادي ؟=P =) السؤال موجه لكم ياللي عازميني يوم الثلاثا انزين .. بما إني معزوم بمعظم العشوات والغدوات والريوقات فـ راح أعزمكم هني بالبلوق على حلو من شغل ايدي سويته مرة حق القروب اللي معاي بالبرنامج بعدين سوينا حفلة بالكلية .. واللي معاي بالقروب لزّمو علي أسويه مرة ثانية يمكن تعرفونه أو مار عليكم من قبل بس اللي انا اسويه يتميز بطريقة التقديم =) ..:: زرعات الأوريو ::.. أول شي تييبون علبتين قيمر ( قشطة ) .. وطبعا بأمريكا ندور القيمر دواره .. أحب آخذ قيمر من البقالة العربية
بعدين تحطون عليه علبة كريمة سائلة  وتحطون معاهم جيسين دريم ويب  وتخلطونهم عدل .. وتخلون الخلطة على جنب تييبون أكواب قهوة صغيرةوتحطون فيها مكعبات كيك سارالي كاكاو .. أو أي كيك كاكاو ثاني* أنا أفضل الكيك اللي يكون متشرب كاكاو سائل *وتقدرون تضغطون الكيك باستعمال كوب فاضي  بعدين تحطون الخلطة فوق الكيك  وتييبون بسكوت اوريو وتطحنونهوترشونه واهو مطحون فوق الخلطة  وتحطون الكيك بالثلاجة لما يمسك عدل
بعدين تحطون أي نوع خضرة للتمويهساعات استعمل نعناع وساعات بقدونس أو أي شي متوفر  وتقدمونه بسحارة "الشبرة" أو بأي طريقة تنفع للتمويه=) لما وديته حق القروب اللي معاي وديته بهالشكل  قعدو ربع ساعة يناقشون الحدايق والزرع وليش خالد يايب نباتات لما قلت حق اللي عازمنا ابيته عطني قفشة وكليت الكيكة ضحكو ضحك على روحهم .. كانو مصدقين انه زرع جربو تسوون الحركة مع أهلكم وربعكم .. وما يمنع تقولون لي شيصير معاكم ..:: =P الشيف خالد ::..
|
Comments
..عساك ع القوة ..
قبل..كان عندي سوالف ومن بدري حبيت اضمها للأجواء ..
بس عدت الساعة 12 الظهر ..
بعدها..أبي أكتب كلمتين على بعض مالقيت ..
فتحت لبلوق قريت أول جملة أربع مرات ما أستوعبت وش قريت ..
فقررت أقصى شي ما أفوت التهنئة في مثل هاليوم المميز ووثق فيه التجربة ..
لو قلت "قريت الموضوع عشر مرات"..جد مو مبالغة ..
ومع استمرارية العادة اللي أختلفت بحالتها البعيدة عن التركيز ..
قريت .. وقريت .. وقريت كم مره ؟ الله أعلم ..
شنو قريت أصلا ؟ " الله أعلم " ..
وقفتني جملة:"تييبون أكواب قهوة صغيرة"..
بحركة سريعة .. متتابعة ..على الصور اللي بعد هالجملة ..رجعتني لها مره ثانية ..
كأني نايمة وفجأة صحيت !..
ضحكت .. ضحكت من قلب !..
وأنا من أول ماعرفت طريقة التقديم كنت اتسائل اقول:اللي يبي يستمتع بهالحلا يبي له ملعقة طويلة تتناسب مع طول الكاس تسمح له يوصل لعمق تذوق مثل هالطبقات !..
اعتقد اغلب المواقع اللي تعرض هالوصفة بعيد عن التميز ..كانت الخلطة بدون لكريمة السائلة..
فكنت اتسائل صدق مابحتاج اضيف سائل مثل الحليب يحرك الخليط !..
وبما ان "لكريمة السائلة" مو متوفرة عندي قررت اسوي الوصفة على الطريقة السائدة بين المواقع مع الحفاظ على عنصر التميز !..
حطيت القشطة بعدين لدريم ويب حسيت ناقص شي .. ضفت حليب طازج اقنعني بالاستمرار ..
جينا لسالفة الكاسات مرة ثانية..حسيت من اول ثلاث كاسات ان الخلطة ولا ممكن تستوعب كمية الكيك اللي حضرته ..
كيف يقول: 2 قشطة و 2 دريم ويب !..
المشكلة أغلب المواقع تأيد هالخلطة !..
عدد الزرعات أقل بواجد من المتوقع !..
الغريب بالموضوع أني مواصلة من أمس ..كيف بقمة تناحتي توني انتبه لهذي النقطة !..
طبعاً ملاحظ حجم الكاسات اللي حضرتي استخدمتهم ^_^
وأنا أقول كيف ومين اللي بيتحمل كل هالحلا بكاسة وحده !..
**********
ومع نهاية هالرحلة أحب اهديك بدوري كأول تجربة -كيكة الميلاد -->كيكة البقدونس :P
ولو اني أحسها منظر بـس على كل هالخزعبلات اللي صارت ..
عموماً:كل من شافها يقول مين اللي بياكلها هذي !..
أما بالنسبة لسالفة الشمع فـحبيت أستبدلها بشي مفيد اكثر مثل البقدونس عشان نريحك ونوفر لك أكسجين :P
فيك تتفضل ^_^
http://www.fineupload.com/DOWNLOAD/78eae736/1-1-2008.JPG
وعسى أيامك كلها حلوه وأيامنا تحلا بك ^_^
وكل سنة وانت سالم يارب والله يجعلها بداية خير وتبقى غير ..
- هابي بيرث دي فور يو -
وتقبل تحيات الشيف: فضاوه ^_^
Posted by: Rosemary | January 1, 2008 08:35 AM
تسلم ايدك على الكيكه الحلوة=)
بس انا حاجزة اول كوب عاليمين عشان شكل البقدونستين واهما منسجمين عجبني ;P
في وحده شكلها ملقوفه هم عجبتني هم عاليمين لو تلاحظها لول احسها مستانسه وملقوفه بنفس الوقت
اتمنى انك قضيت اجازة حلوة مع اهلك و ربعك واحبابك =)
بس مهما صادفت من الدموع استحمل لان في هذي المواقف يكون الدمع اصدق شي واهو سيد الموقف .. فـ الله يعينك ^__^"
ويردك بالسلامة باعلى الدرجات ان شالله =)
Posted by: manooya | January 10, 2008 09:52 PM
ودي القاة بمحل واشتريةجاهز مو انا الي اسوية تعرف محل يبيعه؟شكلة حلو
Posted by: فراولة | February 14, 2008 11:29 AM
اول شي السلام عليكم ورحمة الله وبركاته
ثاني شي اسمح لي انقطعت فترة طويلة ما دشيت مدونتك ولا تابعت أخبارك الممتعة
وثالث شي ... الحمدلله خلصت السميستر ورجعت لأهلك ودارك
وما شااااء الله عليك مبدع من كل النواحي
حتى الاكل
حبيت الطريقة واااااااااااااااااااااااااااااااااايد
وفيها من الابداع اللي يشجع الواحد يسويها
انا عن نفسي نويت اسويها واشوف النتايج بنفسي
بارك الله فيك
Posted by: Hot Chocolate | February 21, 2008 02:38 PM
السلام عليكم
ولله خوش طريقه اعجبتني وصار خاطري اجربها لووول
تسلم يدك
وبالتوفيق
Posted by: mr3 | March 22, 2008 09:08 PM